കര്‍ത്താവേ നിന്‍ രൂപം
വിക്കിഗ്രന്ഥശാല സംരംഭത്തില്‍ നിന്ന്


കര്‍ത്താവേ നിന്‍ രൂപം (ക്രിസ്തീയ കീര്‍ത്തനം)
രചന:സാധു കൊച്ചുകുഞ്ഞുപദേശി





കര്‍ത്താവേ നിന്‍ രൂപം എനിക്കെല്ലായ്പ്പോഴും സന്തോഷമേ
സ്വര്‍ഗ്ഗത്തിലും ഭൂമിയിലും ഇതുപോലില്ലോര്‍ രൂപം വേറെ

അരക്കാശിനും മുതലില്ലാതെ തല ചായ്പ്പാനും സ്ഥലമില്ലാതെ
മുപ്പത്തിമൂന്നരക്കൊല്ലം പാര്‍ത്തലത്തില്‍ പാര്‍ത്തല്ലോ നീ

ജന്മ സ്ഥലം വഴിയമ്പലം ശയ്യാഗൃഹം പുല്‍ക്കൂടാക്കി
വഴിയാധാര തേരിലായ് നീ ഭൂലോകത്തില്‍ സഞ്ചരിച്ചു

എല്ലാവര്‍ക്കും നന്മ ചെയ്‌വാന്‍ എല്ലായ്പ്പോഴും സഞ്ചരിച്ചു
എല്ലാടത്തും ദൈവ സ് നേഹം വെളിവാക്കി നീ മരണത്തോളം

സാത്താനെ നീ തോല്പ്പിച്ചവന്‍ സര്‍വ്വായുധം കവര്‍ന്നല്ലോ
സാധുക്കള്‍ക്ക് സങ്കേതമായ്‌ ഭൂലോകത്തില്‍ നീ മാത്രമെ

ദുഷ്ടന്മാരെ രക്ഷിപ്പാനും തോഷം പൂര്‍ണ്ണമാക്കിടാനും
രക്ഷിതാവായ്‌ ഇക്ഷിതിയില്‍ കാണപ്പെട്ട ദൈവം നീയെ

യഹൂദര്‍ക്കും റോമക്കാര്‍ക്കും പട്ടാളക്കാര്‍ അല്ലാത്തോര്‍ക്കും
ഇഷ്ടം പോലെ എന്തും ചെയ്‌വാന്‍ കുഞ്ഞാടു പോല്‍ നിന്നല്ലോ നീ

ക്രൂശിന്‍മേല്‍ നീ കൈ കാലുകളില്‍ ആണി ഏറ്റു കരയും നേരം
നരകത്തിന്റെ തിരമാലയില്‍ നിന്നെല്ലാരേം രക്ഷിച്ചു നീ

മൂന്നാം നാളില്‍ കല്ലറയില്‍ നിന്നുത്ഥാനം ചെയ്തതിനാല്‍
മരണത്തിന്റെ പരിതാപങ്ങള്‍ എന്നെന്നേയ്ക്കും നീങ്ങിപ്പോയി

പ്രിയ ശിഷ്യര്‍ മദ്ധ്യത്തില്‍ നിന്നുയര്‍ന്നു നീ സ്വര്‍ഗ്ഗത്തിലായ്
ശീഘ്രം വരാമെന്നല്ലോ നീ ഗലീല്യരോടുരച്ചത്

തേജസ്സിന്റെ കര്‍ത്താവേ എന്‍ പ്രാണ പ്രിയാ സര്‍വസ്വമേ
വരിക എന്‍ സങ്കേതമേ വീണ്ടും വേഗം വന്നിടണേ